عهد زمان
بقلم خيرى ناصف khayry nassef
عهد زمان
ساعات نهرب من الماضى
كأنه ما كان
وننسى الذكريات عادى
وننسى عهد زمان
ولما نفوق ونِهْدَى نفتكر
إنه شِبه جنان
مين اللى يقدر ينسى حب الأهل
وطيبة الخِلان
وقلوبهم البيضه النضيفه اللى
مليانه حنان
وإن غبت ثانيه ف يوم يسألوا
عنك فى كل مكان
ويتمنوا لك الرضا ترضى
وهَمُهم هَمَك ومُش إحسان
ودمهم يجرى فيى دمك ويملى
القلب والشريان
فى أحزانك وأفراحك تشوف
جدعان كما الفرسان
هما السند والضَهر لو مالت
الشِيله كما العِمدان
ووقت الشده والقهر ما تعانى
من الوِحده وم الحِرمان
عشانك يشربوا المُر لو هو الدوا
وقت ان شافوك تعبان
وجيل اليوم لوغبت عنهم شهر
وجودك كأنه ما كان
عايشين بالدهاء والمكر
رجاله ف توب نسوان
والشاطر يبيع ويضُر ويتباهى
بغدره كمان
إرسى لكم بقى على بر عهدنا
أحسن والاَّ عهد زمان
